وكتير أقل

وكتير أقل

اخر تحديث في 1/1/0001 12:00:00 AM

الصفحة ارشيفية لمجلة الثقافة الجديدة

مدحت منير 

لإن الشتا داخل أقل
إرجعى المشوار ببطء
خلينى وحدى
خليكى وحدك
إحنا اتملينا بالعصافير الغريبه
والأشجار أقل
بددت كفى
فى طرحة الرمان
وشقيت بقية العمر
وصينى
أفرش سكاتى فى الممر
واشرح لسكان الرصيف
ازاى
تكون الأرض أوسع م القميص
والأرزاق أقل
لإن قصص الأمهات
سكنت مراعى الخوف
استوطنت مواويل العطاشى  أرض النيل
والعايمين أقل
ماعدش فاضل أطبا
يخبوا نقش الضنا
على جلد الثكالى
ماعدش فاضل مطر
يعزل غنا الأوطان
عن هوا المنفى
أنا اللى صابح ماشى
والطرق مدهونه للعجل السريع
والعناوين أقل
أنا اللى باقى
من زمان الوصل
افتكرت إن القمر
منصوب على الساحل
يصطاد شجن للعطارين
أنا الابن الوحيد
قلبى اللى فاضل
بعد ما انهارت بيوت العمر
بيتحول هدوم للشتا
والشتا 
داخل أقل


مجلة الثقافة الجديدة

راسل المحرر @